記得當年第一次去迪士尼
同個一樣麻甩系嘅朋友去
兩位正席花樣年華嘅我哋
入到去如此夢幻嘅樂園
竟然用左一個鐘就出番黎
當年樂園對毫無少女心嘅我黎講
就好似一粒輕輕一挖
再輕輕一彈嘅鼻屎一樣
無任何留戀嘅空間
但今次同左一班
好有行動力又好夢幻嘅朋友去迪士尼
烈火雄心嘅我企係大家隔離
就好似筋肉人企在係一堆hello kitty 隔離一樣
為左令自己跟得上大家夢幻嘅節奏
為左打呢一個夢幻樂園副本任務
所以一入樂園我決定課金換裝
裝備左一個彷如回到童年嘅貓袋
即時夢幻值同童真值提升幾倍
加入埋隊伍之後
即時對「老來先黎玩卡娃伊mode？！」嘅內心糾結無效化
呢一趟冒險入面
大家都不停令我解鎖成就
因為佢地一入黎就黎個重口味
玩乜鬼灰熊山谷
生來最怕離心力嘅黃瀞儀
連玩海洋公園飛天千秋都喊嘅黃瀞儀
玩孖寶兄弟都覺得有離心力嘅黃瀞儀
竟然坐上左令人毫無生存意欲
又冷冰冰嘅鐵車上面
係來回地獄又折返人間嘅鐵軌上
露出一副彷如腸胃炎嘅痛苦樣
（參看圖五、六）
完成左一次痛苦嘅體驗
以為大家會對生命力蟻般薄弱嘅我
施出一點點憐憫
但大家無 係一D都無
大家玩完仲係露出一副童真又夢幻嘅笑面
開心又雀弱咁衝去玩第二個item
呢一刻嘅我見到嘅畫面
係一班將人帶入地獄嘅可愛小天使們🥺
經過掛住可愛熊皮嘅死神山谷後
仲有玩左以前試過玩到喊嘅Space mountain
我帶住過往嘅恐懼坐上列車
呢刻心情就好似善逸知道列車上有鬼一樣
坐上列車 架上安全欄
本應恐懼彌漫住整個腦嘅時候
突然動漫主角嘅熱血魂充滿係我個心到
「我唔驚！」「我唔要再驚！」
「我要戰勝恐懼！」
然後好似開寫輪眼一樣
擘到對眼比平時更大
如果你有特別技能嘅話
個下應該感受到我嘅卓羅瞬間變得好強大
然後我好順利咁
係space mountain 到吹到對眼好乾
同埋帶住歡樂嘅心克服左我嘅恐懼
過程我竟然真係唔驚
（雖然呢個機動遊戲對大家黎講係碎料，但對一個超恐懼機動遊戲嘅人黎講，係地獄）
好多謝呢幾個長期散發住夢幻光環嘅小天使們
迫我玩左堆機動遊戲
令我發現原來而家嘅我
已經係一個遇怪魔我即刻變大個嘅黃瀞儀
有時有d失敗
你以為會跟你一世
但係原來只要放手一搏
凡事都可以係有可能
呢一年哥哥同我講過一句說話
我好深刻
「改變唔係慢慢，真正嘅改變係可以一下 180度就改變。」
係決心
人生好多時都好似坐上左無限列車咁
有時唔覺唔覺咁就loop住係一件
未必係真嘅野上面
唔想清醒唔想改變
必死嘅決心真係好難
但如果做到攻克己身
其實每個人都可以係浴火重生
成為鳳凰
打完篇千字文
比個總結
總結：
我真係愈黎愈中二病
完。
#有無人真係會睇哂我講乜
#滔師傅講經
#disneyland
#迪士尼
Search